يا رب أنت الكريم

ليه يا ربي الايام متقسمين شوية غم وشوية هم وحبة طين

وان المحبة عملة راحة من سنين

ليه يا ربي في ناس اكلة وشاربة وناس في الدنيا دايبة

والحيطان معششة علي ناس ودافية وناس في الشوارع حافيه

ليه يا ربي في اغنياء  وشحاتين وحراميا ونصابين

ليه يا ربي هذا عتاب الاحباب لمن احب

ليه يا ربي في ناس وناس

ناس في النعيم متنعمة

ناس أكلها طين شيلها طين وفي الهلاك مسحولين

ليه يا ربي كلمة رجاء مش اعتراض ولا قلة ادب

حبة طمع في رحمتك ومحبتك وحبة محبة وشوية دلع

انت اللي قلت انا الرحيم ، انا العليم. انت اللي قلت انا الكريم انا الغني

يا رب اغني كل المحرومين اعطيهم حبة من حنانك

يا رب واغفر كل اللي دق بابك

يا رب  أنت الكريم